A cantora e compositora, Ugia Pedreira, e o dramaturgo e contador, Quico Cadaval, protagonizan o vindeiro episodio de Referentes. Poderá verse a través do perfil de Facebook e da canle de Youtube da área de Cultura da Deputación o venres 28 de outubro a partires das 12h.
Desde os inicios das súas respectivas carreiras -un tema sempre presente nas conversas de Referentes-, ata como viven a situación actual a nivel persoal e profesional, pasando por anécdotas familiares, salientando a influenza feminina, centran a conversa do vindeiro programa.
Ao longo da conversa van abordando como a contorna das súas infancias e xuventude foi influíndo na súa educación social e persoal, a visión do mundo que iso lles aportou; ou como é a súa relación co público dependendo dos diferentes formatos de espectáculo, ou como se preparan a nivel persoal para actuar no eido da música e das artes escénicas.
Ambos contestan, ademais, á pregunta que os ‘referentes’ do anterior episodio –María Reimóndez e Oliver Laxe-, lles deixaron formulada: dunha banda “que conten algunha experiencia que tivesen na colectividade e que experimentasen como algo transformador”, e por outra “que indiquen que lles falta para ser máis coherentes ou estar máis conectados cos seus corazóns”.
Nesta segunda tempada de Referentes, que se estreou o pasado mes de abril, participaron Margarita Ledo en conversa con Xabier Fortes, Melania Freire con Pepe Barro, Pepe Solla con Manuel Gago, María Reimóndez con Oliver Laxe, e Ugia Pedreira con Quico Cadaval. A segunda tempada de Referentes rematará cun último episodio no mes de novembro.
