Códice Feminino

Proxecto de divulgación histórica e cultural que busca recuperar e dar visibilidade a seis mulleres relevantes do Reino Medieval de Galiza a través de formatos audiovisuais adaptados ás novas formas de consumo cultural. A iniciativa combina rigor historiográfico, perspectiva de xénero e linguaxes propias das redes sociais para achegar a historia medieval galega a públicos novos e diversos.

O proxecto materializouse na creación de doce pezas audiovisuais: seis vídeos breves en formato vertical para Instagram e TikTok e seis vídeos de maior duración para YouTube. As protagonistas aparecen nunha conversa ficcionada cunha “viaxeira no tempo”, nun espazo ambientado na época medieval, combinando información histórica con un ton próximo e actual. Ademais, realizáronse sesións fotográficas e infografías divulgativas que complementan os contidos audiovisuais e facilitan a comprensión das biografías presentadas.

A proposta céntrase en figuras femininas que tiveron relevancia na historia de Galiza e que, en moitos casos, quedaron relegadas nos relatos tradicionais. O seu obxectivo principal é achegar a historia medieval galega desde unha perspectiva de xénero, transformando contidos académicos en materiais accesibles, atractivos e adaptados aos hábitos de consumo dixital actuais. Ao mesmo tempo, pretende fomentar o interese pola memoria histórica galega e promover a reflexión sobre o papel das mulleres ao longo da historia.

Complementariamente, o proxecto contempla accións divulgativas en centros educativos e unha estratexia de difusión baseada nas redes sociais, favorecendo a creación dunha comunidade interesada na historia e no patrimonio cultural de Galiza. A iniciativa destaca tamén polo seu compromiso coa accesibilidade, a sustentabilidade e a promoción do talento creativo galego, tanto no ámbito audiovisual como no musical e artístico.