Documental animado dirixido a narrar un dos episodios máis sorprendentes e pouco coñecidos da historia do cristianismo, acontecido no corazón do Reino de Galicia.

A historia xira arredor do roubo das reliquias de santos como San Fructuoso, San Cucufate, San Silvestre e Santa Susana por parte do entón bispo Diego Xelmírez durante a súa viaxe a Braga no ano 1102.

A súa acción, planificada con meticulosidade, culminou cun recibimento multitudinario na catedral de Santiago e consolidou a cidade como un dos tres centros cristiáns máis importantes da época, xunto con Roma e Xerusalén.

O documental combina entrevistas a historiadores especializados coa animación multitécnica inspirada na estética dos códices medievais.

Esta técnica, xa utilizada polo director Fernando Cortizo en obras como O Apóstolo, permite achegar o relato histórico a públicos de todas as idades, mantendo sempre o rigor académico.

Ademais de animacións, incluíronse imaxes reais dos espazos onde sucederon os feitos, conectando pasado e presente.

O proxecto nace como episodio piloto dunha serie para divulgar a historia oculta e fascinante do Reino de Galicia en clave didáctica, con especial interese en chegar á mocidade e ao ámbito educativo.

“Pio Latrocinio” abre así un camiño para futuros capítulos sobre episodios como as revoltas irmandiñas ou o asasinato do arcebispo Suero de Gómez, contribuíndo a rescatar e compartir unha parte esquecida da nosa memoria colectiva.