Persoas maiores
A Deputación da Coruña, no marco das súas competencias, destina importantes recursos á actividade de fomento, principalmente mediante a concesión de axudas económicas orientadas á promoción de actividades e investimentos, e mantemento de centros e servizos considerados de interese público, coa finalidade de contribuír a que as entidades da provincia acaden os obxectivos que lles son propios e de fomentar a participación da cidadanía nos distintos ámbitos de actuación e promover a igualdade de xénero.
O programa de subvencións a concellos e outras entidades locais para financiar actividades de envellecemento activo e actuacións de loita contra a soidade non desexada no ano 2025 convócase ao abeiro do Decreto 99/2012, do 16 de marzo, que regula os servizos sociais comunitarios e o seu financiamento, e do Decreto 148/2014 polo que se modifica.
OBXECTO
O obxecto do programa FOEAC-2/2025 é a asistencia económica ás entidades locais de entre 5.000 e 10.000 habitantes, co fin de contribuír ao financiamento das actividades de envellecemento activo e actuacións de loita contra a soidade non desexada.
Este programa asume a definición de envellecemento activo da Organización Mundial da Saúde (OMS 2002),como "o proceso de optimización das oportunidades de saúde, participación e seguridade, co fin de mellorar a calidade de vida a medida que as persoas envellecen", identificando catro piares fundamentais do envellecemento activo: manter un bo estado de saúde, a seguridade e a protección, o dereito de participación na sociedade e a aprendizaxe ao longo da vida para ter coñecementos e xerar vínculos.
Asúmese a definición de soidade non desexada do Observatorio Estatal da Soidade non desexada como "a experiencia persoal negativa na que un individuo ten a necesidade de comunicarse con outros e percibe carencias nas súas relacións sociais, ben sexa porque ten menos relación da que lle gustaría ou porque as relacións que ten non lle ofrecen o apoio emocional que desexa".
ACTIVIDADES SUBVENCIONABLES
O tipo de actividades subvencionables dentro desta convocatoria no ano 2025 foron:
EA-1 Actividades para a prevención do deterioro físico
EA-2 Actividades para a prevención do deterioro mental e estimulación cognitiva.
EA-3 Outras actividades para o fomento da saúde e da calidade de vida
EA-4 Actividades para a elaboración e execución de Plans locais de loita contra a soidade non desexada
EA-5 Actividades interxeracionais
EA-6 Actividades de acción voluntaria (as persoas destinatarias do proxecto poden ser as receptoras ou as que executen a acción voluntaria)
ENTIDADES BENEFICIARIAS
As beneficiarias deste programa son as entidades locais de entre 5.000 e 10.000 habitante da provincia da Coruña.
As mancomunidades intermunicipais, agrupacións ou fusións que constitúen entidades instrumentais dos concellos e
que exercen as competencias delegadas por aqueles poderán ser destinatarias sempre que a poboación do conxunto de concellos non supere os 10.000 habitantes.
No ano 2025 resultaron beneficiarias as seguintes entidades locais que presentaron os seguintes proxectos.
Durante os anos 2021 e 2022 a Deputación Provincial da Coruña botou a andar un proxecto piloto en materia de soidade non desexada nos concellos de Muros, Vimianzo e Ortigueira.
Esta era unha das liñas de acción contempladas no Plan de acción de servizos sociais 2020-2025.
Para isto estudiouse a realidade municipal a nivel demográfico, económico e social, coa finalidade de propoñer un protocolo de atención no que estivesen implicados todos os axentes claves do territorio (persoal sanitario, negocios, centros de saúde, parrroquias, centros de lecer, etc). Deste xeito poderiase derivar a servizos sociais á persoa usuaria, facer unha valoración e propoñer unha serie de medidas de mellora respecto desta situación.
Así mesmo propoñíase mellorar os servizos municipais dirixidos á mellora da participación social das persoas maiores que se atopen en situacións de soidade non desexada.
A acollida destes plans locais foi moi positiva en todos os concellos participantes que contan con redes de axentes por todas as parroquias do territorio.
Como proposta de mellora deste proxecto piloto, solicitouse por parte dos concellos un reforzo no apoio psicolóxico a ditas persoas usuarias, como forma de mellora da súa calidade de vida.
Actualmente estamos a implementar este servizo de atención psicolóxica nos tres municipios ata novembro de 2023 e polo de agora estamos obtendo un resultados moi satisfactorios.
Nas seguintes ligazóns pódense consultar os Plans locais de loita contra a soidade non desexada así como unha guía e protocolo para a súa elaboración, de forma que esta iniciativa se poida adaptar a outras realidades municipais como boa práctica en materia de servizos sociais.
PLANS DE SOIDADE
GUÍA E PROTOCOLO
GUÍA PARA A ELABORACIÓN DE PLANS LOCAIS DE LOITA CONTRA A SOIDADE NON DESEXADA
A Deputación Provincial da Coruña vén prestando o Servizo de Teleasistencia desde o ano 1999. En principio en colaboración co IMSERSO e a FEMP mediante un convenio tripartito. Desde o ano 2013 a xestión e financiamento do Programa están a cargo desta deputación en exclusiva, contratándose a prestación do servizo a unha empresa especializada nisto.
A solicitude realízana os servizos sociais do concello de residencia da persoa. As persoas solicitantes deben contactar cos servizos sociais comunitarios do seu concello de residencia onde han de valorar a súa situación e orientar cos documentos para a solicitude.