---
title: "Xa está dispoñible o novo programa de Referentes, protagonizado por Margarita Ledo e Xabier Fortes"
description: "O exilio, a resistencia antifranquista, o papel dos medios de comunicación, a escrita, o feminismo e mesmo o fútbol, son algúns dos temas que abordan Margarita Ledo e Xabier Fortes no primeiro episodi..."
url: https://aculturaeundereito.gal/xa-esta-disponible-o-novo-programa-de-referentes-protagonizado-por-margarita-ledo-e-xabier-fortes/
date: 2022-04-29
modified: 2022-04-29
author: "admin"
image: https://aculturaeundereito.gal/wp-content/uploads/2022/04/Referentes_Ledo_Fortes.jpeg
categories: ["Cultura"]
tags: ["cultura", "prensa"]
type: post
lang: gl
---

# Xa está dispoñible o novo programa de Referentes, protagonizado por Margarita Ledo e Xabier Fortes

O exilio, a resistencia antifranquista, o papel dos medios de comunicación, a escrita, o feminismo e mesmo o fútbol, son algúns dos temas que abordan Margarita Ledo e Xabier Fortes no primeiro episodio da nova tempada de Referentes. Desde esta mañá, a conversa completa xa está dispoñible na canle de Youtube e no perfil de Facebook da área de Cultura da Deputación da Coruña.

A conversa, conducida pola xornalista Marga Pazos, parte das súas respectivas infancias e como as súas situacións familiares durante o franquismo conformaron as súas personalidades e idearios. No caso de Xabier Fortes como fillo dun militar detido por montar unha célula democrática no exército, o que segundo conta truncou o seu futuro, “realmente eu non tiña que ser xornalista senón militar, estaba educado para iso” asegura; e no caso de Margarita Ledo como descendente de emigrantes e exiliada ela mesma. Comparten anécdotas simpáticas sobre os códigos e mensaxes cifradas de organizacións que operaban na resistencia das décadas de 1960 e 1970, e avanzan sobre como se conformaron as súas vocacións e traxectorias profesionais ata reflexionar sobre o papel dos medios de comunicación en cuestións tan actuais como o auxe da ultradereita ou o que está a acontecer en Ucraína.

Referentes T2 contempla seis novos episodios, que sairán á luz o último venres dos meses de abril, maio, xuño, setembro, outubro e novembro. Convén lembrar que este ciclo, que xunta a diferentes personalidades do mundo da cultura nun espazo de reflexión e conversa demorada, está concibido como un proxecto exclusivamente dixital.