---
title: "A Deputación leva a Rianxo e a Narón o proxecto “Ben Vennas Maio”, de Pablo Sanmamed"
description: "Promovido pola Deputación da Coruña para celebrar o día Europeo da Música Antiga, o departamento de Cultura provincial apoia este ano a presentación en Rianxo e en Narón do proxecto \"Ben Vennas Maio\",..."
url: https://aculturaeundereito.gal/a-deputacion-leva-a-rianxo-e-a-naron-o-proxecto-ben-vennas-maio-de-pablo-sanmamed/
date: 2023-03-20
modified: 2023-03-20
author: "admin"
image: https://aculturaeundereito.gal/wp-content/uploads/2023/03/Pablo_Sanmamed_Rianxo.jpg
categories: ["Cultura"]
tags: ["cultura", "prensa"]
type: post
lang: gl
---

# A Deputación leva a Rianxo e a Narón o proxecto “Ben Vennas Maio”, de Pablo Sanmamed

Promovido pola Deputación da Coruña para celebrar o día Europeo da Música Antiga, o departamento de Cultura provincial apoia este ano a presentación en Rianxo e en Narón do proxecto “Ben Vennas Maio”, do músico e compositor compostelán Pablo Pérez Sanmamed. As citas, de balde, ás dúas ás 20.30 horas, serán a semana que vén: o martes 21, na Sala Arcos Moldes do Auditorio de Rianxo, e no Pazo da Cultura de Narón, o xoves 23.

“Ben Vennas Maio” é, en palabras de Sanmamed, «un camiño aberto ás Cantigas de Afonso X a través de dúas linguaxes que se encontran: as da música medieval e do jazz». No proxecto, editado por aCentral Folque en formato vinilo, a música conflúe con outras dúas propostas artísticas: as que ofrecen as fotografías de Eutropio Rodríguez e a creación literaria de Alba Cid. «Música, texto e fotografía», explica o compositor, «presentan entidade propia ao tempo que dialogan sobre os temas centrais do disco: as cantigas, o maio, a primavera, a muller».

A liberdade compositiva e de ornamentación son dúas máximas da proposta de “Ben Vennas Maio”. O público de Rianxo e de Narón poderá gozar dunha viaxe a través de nove cantigas da autoría de Afonso X, reinterpretadas, e nalgún caso musicadas, para a ocasión. «Estas cantigas», salienta Sanmamed, «ofrecen patróns rítmicos moi ricos que cobran outra dimensión ollados desde a cultura do jazz. No plano literario, os textos escollidos achegan puntos de vista que a miúdo sorprenden: é o caso de “Non ven al maio”, unha cantiga que ofrece unha aceda crítica aos excesos dos poderosos».

Para a ocasión, Sanmamed (contrabaixo) estará acompañado por Begoña Olavide (voz e salterio), Elena Tarrats (voz), Xurxo Varela (voz e viola de gamba), Iago Mourinho (piano) e Chus Pazos (batería).

Para o concerto de Rianxo os convites poden retirase na billeteira do Auditorio desde unha hora antes do comezo do espectáculo. Para o de Narón, as reservas están dispoñibles na web www.padroadodecultura.es o no teléfono da billeteira do Pazo da Cultura (981 102 897).